ज्याेतिषीले राेकेका कारणले प्रम देउवाद्वारा चुनावकाे मिति घाेषणा गर्न विलम्ब

प्रधानमन्त्री शेरबहादुर देउवा शीघ्र निर्वाचन घोषणा गरेर आफ्नो राजनीतिक भविष्य सुनिश्चित गराउने योजनामा भए पनि ज्योतिषीका कारण निर्वाचन मिति घोषणामा विलम्ब भएको समाचार प्राप्त भएको छ ।

वामपन्थी कम्युनिष्टहरूबीच गठबन्धन बन्न नदिन अनेक ढङ्गले प्रयासरत देउवा ‘रात रहे अग्राख पलाउने’ कुराले चिन्तामा रहेको बुझिन्छ । प्रचण्ड-माधवसँग मिलेर चुनावी परिणाम आफ्नो पक्षमा पार्ने योजनामा रहेका देउवाको सपना काङ्ग्रेसलाई संसद्को सबैभन्दा ठूलो दल बनाउने र ‘स्याटलाइट’ पार्टीहरूको सहयोग लिएर काङ्ग्रेसकै नेतृत्वमा सरकार गठन गर्नु रहेको छ । त्यसनिम्ति उनी यथाशीघ्र निर्वाचन गराउन चाहन्छन्, सकेसम्म कात्तिक महिनामै चुनाव गराउने देउवाको योजना हो । तर ज्योतिषीले साउनको पहिलो सातामा चुनावको मिति घोषणा गर्न उत्तम हुने सुझाव दिएकोले देउवा धैर्य गर्न बाध्य भएका हुन् ।

प्राप्त जानकारीअनुसार आगामी साउन ३ गते चुनावको मिति घोषणा गर्दा देउवाको पक्षमा परिणाम आउन सक्ने सुझाव ज्योतिषीले दिएको बताइन्छ । चुनावको मिति घोषणा भइसकेपछि राजनीतिक रूपमा आफू ज्यादा सूरक्षित हुने विश्वास देउवाले गरेका छन् । देउवामाथि पार्टीका हितैषीहरूले भने साउन ३ गतेसम्म नपर्खिन र तत्काल चुनाव घोषणा गर्न दबाब दिइरहेका छन् । चुनाव घोषणा नगर्ने हो भने संसद्मा अविश्वासको प्रस्ताव दर्ता हुन सक्ने या बहुसङ्ख्यक सांसदहरूले राष्ट्रपतिलाई गुहार्न सक्ने भनी हितैषीहरूले देउवालाई सचेत गराएका छन् । घटना र विचारबाट